Esplora jingħata s-Siġill ta’ Kwalità Assigurata mill-Awtorità Maltija għat-Turiżmu

Bi pjaċir inħabbru li ċ-Ċentru Interattiv tax-Xjenza, l-Esplora għal darb’oħra ngħata s-Siġill prestiġjuż tal-Kwalità Assigurata mill-Awtorità Maltija għat-Turiżmu (MTA). Dan ir-rikonoxximent huwa xhieda tal-impenn sod tagħna fid-diversi aspetti tal-esperjenza li noffru lill-viżitaturi li jżuru l-Esplora.

Evalwazzjoni Rigoruża għall-eċċellenza

Biex entità tirċievi dan is-siġill trid tgħaddi minn proċess rigoruż ta’ evalwazzjoni mill-Awtorità Maltija għat-Turiżmu (MTA). Dan il-proċess jinkludi firxa wiesgħa ta’ kriterji, li jiżguraw li kull aspett tal-esperjenza tal-viżitatur jiġi analiżżat u jilħaq standards għoljin. L-oqsma tal-eżaminazzjoni jinkludu:

1. Faċilitajiet: Infrastruttura moderna, miżmuma tajjeb u aċċessibbli.
2. Indafa: Ambjent nadif u iġeniku għall-viżitaturi kollha tagħna.
3. Ambjent: Atmosfera li tilqgħek.
4. Saħħa u Sigurtà: Nimxu ma’ protokolli stretti ta’ sigurtà u standards tas-saħħa.
5. Sostenibbiltà: Prassi ekoloġiċi u sostenibbli.
6. Inklużività: L-iżgurar ta’ esperjenza inklużiva għall-viżitaturi tagħna.
7. Taħriġ tal-impjegati: Programmi komprensivi ta’ taħriġ għall-impjegati biex jiġi xprunat il-livell tal-għarfien, l-effiċjenza u s-sens ta’ korteżija taghħom.
8. Servizz provdut lill-viżitatur: Servizz eċċezzjonali li jiżgura li l-viżitaturi jkollhom żjara pożittiva u memorabbli.
9. Esperjenzi offruti: Firxa wiesgħa ta’ kontenut ippreżentat b’mod tajjeb u li jikkonsisti f’ live shows tax-xjenza, workshops interattivi, esebiti interattivi u shows tal-Planetarium.

Tradizzjoni ta’ Servizz mogħti b’Eċċellenza

L-Esplora ġie onorat b’dan ir-rikonoxximent b’mod konsistenti tant illi l-ewwel ma rċevieh kien ħames xhur biss wara l-ftuħ tiegħu fl-2017. Minn dakinhar, ksibna punteġġi għoljin ma’ kull tiġdid. Dan ir-rikonoxximent konsistenti huwa eżempju ċar tad-dedikazzjoni tagħna lejn titjib kontinwu u eċċellenti. Kull premju li ningħataw jenfasizza l-impenn tagħna li nkomplu nsaħħu l-esperjenza għal kull viżitatur li jiġi jżur iċ-Ċentru Interrattiv tagħna.

Ippjana ż-Żjara Tiegħek

Nistednuk iżżur iċ-Ċentru Interattiv għax-Xjenza  u tara b’għajnejk ir-raġunijiet li aħna rċevejna is-Siġill ta’ Kwalita’ Assigurata, filwaqt li tesperjenza faċilitajiet tal-ogħla livell, esebiti interattivi, u s-servizz eċċezzjonali li jiddistingwi ċ-Ċentru tagħna bħala d-destinazzjoni ewlenija għax-xjenza u l-iskoperta.